J017 - SURAT NI TATAY (Contributed by Bert Pocong - 27 Oct. 2005)

~~~

Dear Anak,

Medyo mahinay an pagsurat ko yana kay aram ko man na mahinay ka man pud magbasa. Adi na kami yana sa probinsya para istaran inin balay na bag-o ginbakal. Pero di ko pa mahatag sa imo an address kay gindara san dati nag-istar didi an number san balay. Para amo daw kuno gihapon an address na inda gamiton sa inda balhinan. Tama man tood. Maayo man ini na lugar kay harayo sa Manila. Yana na semana, kaduha pala ka beses nag-uran didi, an primiro na pag-uran umabot sin tulo ka adlaw, tapos sumunod dayon an pan-duha, upat ka adlaw. Kabaradli lang usahay san mga baligya didi. Pareho san nabakal ko na shampoo, diri man nabura. Ginsunod ko man unta an instruction. May naka-marka na FOR DRY HAIR, kaya wara ko pagbasa-a an akon buhok. Sige la kay akon ini nyan pabalyuhan sin iba. Tapos, san isad liwat ka adlaw diri ako nakasulod sa balay kay di ko maabri an padlock. May naka-marka na YALE, pero napaas nala ako sin kakasiyak di ko gayod maabri. Puro mga palpak an mga gamit didi. Ireklamo ko ini sa dati nag-istar didi. Kagasi siguro ninda kon di ko aram na an tagalog san YALE na SIGAW, ako pa, wise ini. May igwa gali ako sin nabakal na jacket. Ginpadara ko sa post office, pero kay bali ka mahal san sukot sa akon kay mabug-at daw, siguro sa mga butones. Kaya ginpanangkas ko an mga butones kag gin-suksuk ko nala sa bulsa san jacket. Ikabit nala dida pag-abot. Naghatag man ako donasyon sa mga biktima san bagyo, wara ko na pagpirmahe an tseke kay gusto ko na ANONYMOUS an donor. Si Jun gali may trabaho na didi. Sabi niya, under niya an 500 katawo. Tigharas siya san mga sig-ot didi sa memorial park, okey man an sueldo kay above minimum. Si imo Ate Baby naman, nanganak na. Kaso di ko pa aram kon lalake o babaye ba an anak, kaya di ko pa masabi sa imo kon uncle ka ba o auntie. Sa Oktobre gali, mauli anay ako dida. Pero kay naglilibog ako kun nano an maayo sakyan. Diri ba an Victory Liner, BLTB Liner, JB Liner kag Philtranco Liner mga bus ini? Naman inin Panty Liner, bus man? Hain man banda an inda terminal? Gusto ko didi magpurbar pagsakay kay bagan bag-o. San isad gali ka adlaw may nag-interview sa akon, taga Magandang Umaga Bayan daw sinda, adto gani ako sa TV. Ginhunga ako kun nano daw an inglis san kugmo o kulangot? Wa ko masabat....Ikaw anak aram mo?

O sige anak, wara na ako kaayo sin balita. Surat ka nala pirmi ha?

Love,

Tatay

P.S. - Butangan ko unta sin kwarta ini na surat, kaso nasarado ko na an sobri. Sa sunod nala ha?

~~~

J016 - MANAMIT AN SURA (Contributed by NMT - 25 Sept. 2005)

~~~

May usad na biyahedor nga nasiraan an inda sarakyan sa medyo awa-aw na lugar. An mga pasahero san inda ginsakyan nag-iya iya na sin diskarte kon diin puede makikaon kag makikaturog kay medyo hapon na. Siya man, naglakat pa unhan basi pa makakita siya sin balay na makaonan kag makaturogan. San haros 10 kilometros niya na paglakat, nakakita siya sin balay nga may nag-istar nga mag-asawa nga gurang na lampas na sa mga sitenta anyos na an pangidadon. Ginpadayon man siya san mag-asawa kag maayo man an pagbaton sa iya. An balay luma na kayo kag haros wara sin mga gamit sa sulod.

BIYAHEDOR: Lola, kamo lang didi? Hain naman an iyo mga anak kay kamo na man lang?

LOLA: An amon mga anak dagko na kag hadto na sa harayo na lugar kag wara na kami didi pagdumduma pa, mga maayo na an inda mga buhay kag wara na sinda makabisita didi sa amon tuna sadto. Kaya kami nala ni imo Lolo didi an nag-istar.

San panigab-i na, maayo an inda sura kay manok na tinomkan sin lubi. Gin ganahan an biyahedor pagkaon kay manamit kaayo an inda sura. Haros nakapira siya ka plato sin kaon. Gin isip isip niya nga ka maayo sinin mag-asawa kay maayo magluto. Wara siya makatios kaya ginhunga niya an mag-asawa kun nano an sekreto kay kanamit man san pagkaluto.

BIYAHEDOR: Lola, nano man kay kanamit san aton sura? Maayo an pagkatumok. Medyo suro sapotok pa gayod. Nano man an iyo sekreto sini? Gin ano man ini pagluto?

Si Lolo an nagsabat.

LOLO: Sus nonoy, wara ina sin sekreto. An matood, kun kompleto pa unta inin akon ngipon diri lang sugad ina sina kanamit.

An mag-asawa gali wara sin kagudan o coconut grinder.